مَصر بتتكلم من تاني.. للشاعرعبدالحميدالباجوري

مَصر بتتكلم من تاني..
من بعْد بُكايا وتنهيدي
من بعْد مَ حسِّيتْ بشهيدي
نازل في تـُرابها يصحيها
ويشيل الغَمْ اللي بلينا
من جهلْ وفقرْ..ومانعاني.

مَصر بتتكلم من تاني..
من بعد مَ سَمعت أشجاني
ولسان المَجروحْ الدَّامي
في ربوع النيل اللي روينا .

مَصر المَحفوظه..
جيل ورا جيلْ
شايفاني بناجي صُبح وليلْ
وانا جالسْ وحدي تحت نَخيلْ
وباقول للرَّبْ بوجداني :..
ياإلاهي .. يا ربي ..
طفح الكيلْ
صبَّرني ياربي ..
زاد السيلْ
ده الظالم بالظـــُلم .. أحاطني
بمرارُه وعذابُــه ..عصرني
واشكالْ ..
والونْ من شياطينُه
واقفه لي بتفرضْ أساليبُه
وبترمي كياني جوَّه النــَّارْ
يا لطيف ياخبيرْ ..
باتوسل ليكْ
دبــَّرلي شئوني ..
الخير بإيديكْ
خرَّجني من قلب الأخطارْ
واكشف لي بنورك شرَّ الغيرْ .

مَصر بتتكلم من تاني ..
من بعْد مَ شعرت بالنَّجوي
نطقتْ بسْخونه للشَّكوي
ضمَّتني إليها وسألتني :..
طب مين الجاني..؟؟؟.. قول ياابني ..
بلَّغني بأسمُه ..؟؟؟.. تشوف حَسْمي
أنا قولت ياأمي :..
!!!.." ده مش واحدْ "
دي عصابه خطيره..
عددها كبيرْ
هَمَستْ لي بشئ..
وهمْس الأمْ
ده طبعاً..
طبعاً ..
عند ولادهـــا له تأثيرْ .
صَرَخَتْ ..
وقالت لي :..
ياحبيبي
إن كان لي خاطرْ..
أسمعني..
أسمعني تنقذ" أحفادكْ "
ظالم فاسدْ أنقذهُمْ مِنْ
عايش على أرضي بيتآمرْ
والظالمْ ديماً لــُـه آخــرْ
كرَّرت الكلمه وقالتْ لي :..
" ده انا أمـَّـــكْ "
وان كان لي خاطرْ ..
أسمعني ..
أسمعني تحافظْ على شرفي
ده انا مصر المحروسه ياأبني ..
وأمانه في إيدك من ربي
أحفظْ لي كرامتي
وصونْ عرضي
عليني ..
وارفعْ من شأني
ده انا مصر المحروسه ياأبني.

بقلم الكاتب/ الشاعرعبدالحميدالباجوري